Лесна гатанка

Лесна гатанка

 

Тој сè знае, и сè може,

чувај ни го него, Боже!

Знае држава да води,

знае земји, знае води,

знае здравство, знае спорт,

од култура нема зорт.

Како да е архитект?

Има голем интелект.

Економија и право:

кој му смета – лежи здраво.

Знае гласови да брои, ако треба – и ги двои,

и ги трои, а и знае да ги штрои.

Знае сè што треба да се знае –

сега зеде голем заем.

Ние без него сме – ништо.

Јас, без него – гол ко пиштол.

Тој во партија ме кани –

за да немам лути рани.

За да имам работа –

понеделник до сабота,

да ми престане голготата,

да си товарам банкнотата,

за да можам да живеам –

маки да преживеам,

и да можам да се женам,

семејство јас да си кренам,

за да можам да остварам –

сам да не си остарам, без род да не останам.

Тој е најдобар на свет –

нешто како: женски зет.

Кој ли канал да го гледаш

на него ќе налеташ.

Ќе не води вечно нас –

кому џелат, кому спас.

<Константин Карев, 22.07.2014>