Дали постои Господ?

Дали постои Господ?

Господ е татко ми.

Тој на 85 години,

во 3 саатот ноќе,

прави палачинки.

Господ е мајка ми.

Таа си отиде,

без да ги објасни работите,

како што треба.

Господ сум јас.

Јас сум нивен син.

Константин Карев

05.02.2015

Тој пробива во души

Поетот не е слуга, поетот не е роб,

поетот е независен, поетот не е сноб.

Поетот стрела зборови поврзани во стих,

и може да е тивок тој, но зборот не е тих –

тој пробива низ бункери,

преградите ги руши,

тој в срце те погодува,

тој пробива во души.

А  ако се премислуваш,

со честа калкулираш,

и мислата зародена

од себе ја абортираш –

ти не си поет, не си свој,

сам себе се негираш.

И глумиш ти постоење –

ти само вегетираш.

Константин Карев

04.02.2015